最緊要綽頭！

搞左咁耐，卒之的起心肝開始我的 8,760小時...前....既幾百小時。

早響 2009 年 8 月，就已經聽特首話日本同香港會簽定 Working Holiday 協議。嘩！日本，開心死，但等呀等呀等，打左兩次電話去領事館︰「你留意消息公佈啦！」呀嫂，鬼唔知？幾時先得嫁？結果，一等再等，卒之等到成事。2010 年 1月日本領事館正式公佈申請詳情 (但資料都唔係好多)。好彩我今年仲係 26 歲，未超齡 :P

日本Working Holiday一年派 250 個VISA，只要你係18-30歲，有少少火熱，又有丁丁gut屎，再黎多 et et 屎忽痕既話就可以申請。第一批申請1月開始，先派 125 個VISA，5 月又派 125 個。呢個program 唔一定要識日文先可以報名，響芸芸申請者中突出自己既申請變得異常重要。

Working Holiday 要準備下列文件︰

(1) 日本入境簽證申請書 (彩色證件相1張)
(2) 護照影印本
(3) 用英文或日文寫都得既自薦信/理由書 (唔限頁數)
(4) 個人履歷
(5) 身份證正背面影印本
(6) 在學證明書或最終畢業證書影印本
(7) 證明持有足以購買回程機票既款項及足夠維持在日本逗留初期之生活所需費用既資料 (相當於 HK$22,000（回程機票 HK$6,000、初期生活費 HK$16,000）或以上)
(8) 其他自我推薦之資料

申請人只需用 A4 白紙提交以上種種，你諗下，睇 application form 班人點會有心機 evaluate？為左響日本電波狂玩勁做一年，我決定豁出去！！玩綽頭！

我用個 clear file 入起晒 d doc，然後將早年去日本時影既相，仲有我同日文同學參加「日本事情」比賽既相，通通貼響個 file cover上面，再寫上「日本ヘ行きます！」，希望可以吸引到評判，等佢地望多我分 form 幾眼。掂呀！！



但好景不常，去交申請表時，個領事館姐姐竟然話︰「小姐，唔駛 file 嫁喇，你mong 晒d紙出黎一疊交就得。」OMG！我整得咁辛苦，唔係唔收呀~~ :{ 「你收啦你收啦﹏」初時佢都唔滯，因我又 ai 再 sai，好誠懇咁叫佢收左佢，皇天不負有心人，個姐姐終於肯收我分form (抵你響領事館做朝九晚五唔駛 OT，有前途，哈哈！)。完成手續，個姐姐畀左張印有我申請 no 既收據我，好緊要嫁！於發表結果當日，登入領事館網頁，就可以對一對收據上面既號碼，知道成功與否！

一個月後就收到電話︰「林詠詩小姐，通知返你，你既申請成功左。」好野！！

其實，我都唔係淨係玩綽頭既，我份自薦信寫得好有意思嫁。我諗最緊要寫點解你會參加、你去到日本後既計劃、想點玩、點做、點食、點住等等。我就希望響未來既一年追住 d 祭り走(但...日本3日唔埋兩日就有祭り…唔理喇…追得幾多就幾多！)



開心過後...惡夢開始了.... :{