賣煙前後….

因增稅問題，日本煙自 10 月 1 日起，平均漲價近四成，由 300yen-350yen 加價至 410-440yen 不等，唔想捱貴煙的日本煙民近排都 1 carton 1 carton (1 carton 10包) 咁買，店長亦一早入定貨應付需求。

9月30日係加價前最後一日，煙民都最後衝刺掃貸，哈哈，我有幸得店長賞識…把低B 聲，呢晚同韓國 WH キム負責在店外擺檔叫賣。5pm-11:59pm 不停的︰「いらっしゃいませ、タバコいかがですか？明日、タバコ値段が上がりますので、今晩ラストチャンスです、ぜひご利用くださいませ！」店內都總動員負責收銀畀貨，結果全日賣左愈 2,000,000yen (約 20 萬 HKD$) 煙，高峰期 9pm-11pm 有 400,000yen，勁呀！

最後…我趕唔切搭尾班車……又唔夠錢搭的士 (另外原因係搵唔到的士)，又唔想在 McDonalds 過夜，結果係…在日本參加第二次毅行者，斗膽深夜沿住高速公路行…返屋企…因為太驚的關係，有幾段路用跑的 :P。ついに零晨 4 點…

第二朝返 7am，5:30am要出門口 (=唔駛瞓)。人老了，通一晚頂再返 6 個鐘想死一樣 …

~ 有吉詩 提提你 ~

日本終電時間通常係00:30-00:40 (JR、私鐡各不同)，如果唔想在麥當勞過夜真係要 check 清楚班次，更要睇清楚終電到唔到你屋企，好似我咁，終電係就係搭到，但只係去到距離屋企 10 個站既駅…

一個人．五個月

又一個月，咁搞法真係好快就 12 個月….我想做、可以做既野會唔會做得切呢？而 7 個月後返香港要做、應該做既事係咪要準備呢？(>_<) 因為科技發達，日日上網 check email、update facebook 等，除左住既地方唔同、身邊既人講野既語言唔同之外，生活好似同在香港沒什麼分別，中秋的月亮還一樣圓呢！而表叔的到訪，更讓第五個月不再是一個人，哈！ Part-time 的更期起了少少變化，由一個禮拜返 5-6 日減少到 4-5 日，人工自然都少左 (-__-)，要慳 D 了…(筆者在發布文章當天約朋友食飯又駛錢…都係食左先慳…哈哈)



在便利店工作三個多月，已習慣同事 "Ung" D 外國客畀我，亦聽慣佢地話我 D 英文好 (其實都係好普通的幾句…)，驚覺店長、同事接待日本客同外國客態度的不同︰前者異常親切、後者求求祈祈，相信同語言不通有關，亦因為外國客多為遊客，無需要建立長遠關係…掛！唔鍾意我個嬸嬸有時更會好 rude 咁對 D 遊客，覺得佢地煩+阻掟 << 我覺得。其實我都唔明點解日本人唔(肯)學英文，真係好簡單的單字都唔識。但再…諗…，點解全世界既人都要學英文，而唔係佢地學返其他國家既文。如果一個國家夠強，係咪就唔需要靠別國，可以自給如足，等人黎奉承？宜家都好多人學普通話~~嘻嘻！

退職願

7月尾時 Daily Yamazaki 店長問我 8 月既星期六晚上可唔可以頂一位要返中國結婚的同事 (オウクン)，心諗︰「梗係唔得啦，我要返 SunKus (另外一間店)…」所以同佢講我要同朋友參加交流會唔得，但係佢︰「お願いします，8 月だけ。(只係 8 月，唔該你。)」左我好多次，我知如果我繼續 insist 會畀佢知我有另一份 part-time，左度右度，結果都係去同 SunKus 講我有事要返香港一個月，再諗諗下一步點…

唉…但世事點會咁完美，我預計唔止 8 月，未來型仔店長仍會不時叫我返星期六，心諗無理由下下請 SunKus 假，下下返香港﹏衡量過利害後，長痛不如短痛，我決定寫信向 SunKus 請辭，安心做好 Daily Yamazaki 一職，亦唔駛驚因為兩間舖唔同收銀 system 而禁錯制、收左錢 ß 勁呢！人返工我返工，返到要辭職。其實咁都好，多左星期六去玩。

要辭去 SunKus 一職，我是極不願意的，一黎因為店長好好人，二黎無啦啦走人會搞到佢地拿手唔成勢，最最最緊要係我返個時間無咩野做，得閒同同事傾偈:P仲要1,000yen 一個鐘、車錢全包。雖然只有 1 個半月，同副店長 & 丁san 都建立左 D 感情，唉…無計啦，唯有遲 D 先搵佢地玩啦。

平玩日本

Working Holiday，除左 Working，當然就是 Holiday & Holiday！但一個人黎到日本，朋友不多，就算有，佢地都有固定工作，唔會好自由同你呢度玩果度去。如果你係一個鍾意去旅行但又唔想自己 plan 行程的人，クラブツーリズム 啱晒，好似油麻地旅運咁，クラブツーリズム 會提供海外、國內、長線、短線、一日團等等既 Trip 畀你，飛機、巴士團都有，多多有你揀，最緊要價錢實際，內容豐富，如摘葡萄放題一日巴士團 (包午餐) 只需 5,890yen。

http://www.club-t.com/

勁食長腳蟹

「贅沢」日語意思是奢侈咁解，呢餐蟹宴絕對可以用呢兩個字黎形容。

「玄品 以蟹茂」係蟹食專門店，與早前介紹既河豚專門店屬同一集團，不同種類的長腳蟹菜式任君選擇，但對我黎講，味道好似隻隻一樣。因為太「贅沢」了，同朋友share個價值5,280yen既「極コース」，包三種蟹︰ズワイ蟹 (楚蟹)、タラバ蟹 (鱈場蟹)、アブラ蟹既菜式，分別係蟹肉前菜、ズワイ蟹腳刺身 (三隻)、炸タラバ蟹 (三件)、三種蟹火鍋+炭火烤二食，加埋蟹湯潮州粥同自家製雪糕 (ß 可惜唔係蟹味)，我地仲另外叫左個ズワイ蟹腳鐡板燒。

雖然話味道差唔多，但總有分別的︰楚蟹清爽、鱈場蟹最甜，而アブラ蟹肉質就最堅挺，三款都好好味，我地挖盡每個可以藏到蟹肉的角落，所以食到好攰 :P。最後個潮州粥原意係想攞蟹肉殘留在湯既甜味，但因為我地兩個人食一個set，加上有一半蟹攞左去烤，兜湯有幾甜可想而知，結果？…好彩有D紫菜﹏J

~ 有吉詩 提提你 ~

「玄品 以蟹茂」新宿南店

地址︰東京都渋谷区千馱ヶ谷5-24-3 (代々木駅落車會較近)
(NTTドコモ代々木ビルアネックスI 3階)

http://www.ikanimo.jp/

收銀唔易做….

在 Daily Yamazaki 返工已有兩個月，名牌仍然是 "研修中"， 有日有個客都問︰「仲係 "研修中"？」(都唔知畀咩反應…)，相信係同我既日語程度有關，自己知自己事，都唔好意思同店長講︰「店長呀店長，你幾時會畀個名份我？」

如果自己爭氣 D，可能會有 D 機，但自己做事態度硬係改唔到，由香港到日本都係︰求祈 (有時啦…)、唔小心 (有時咁啦…)、心急 (有時係既…)，結果攪到 bit 漏貨、找錯錢 (找少找多都有)、有我既日子收銀機條數硬係 Ba 唔到… L

去完富士山後返工，本應心情靚靚，差足電、事事順利，但店長突然同我講我放假前幫個客交水電煤費時，竟然將一張未收錢既單蓋上印，2,540yen 的一張水費單，最後要店長聯絡個客收返錢，好大獲︰對客帶來影響，而 –2,540yen 對店黎講係一條很大的數！。店長好嚴重的同我講︰「是你的錯。」好驚…好有挫敗感，心諗︰「唔通我成世都會係咁？都會咁唔小心？」唉……

8月30-31日箱根光脫脫溫泉之旅

在富士山睇完日出後，當日馬不停蹄趕去箱根浸溫泉嘆世界！

箱根出名溫泉係人都知，溫泉旅館多到嚇死你，同寶霖睇左好多 reference，左揀右揀，卒之選擇有會員優惠、位於溫泉區塔の沢既「一ノ湯」集團老舖 – 「一ノ湯本館」，6,300yen/人有間可以左碌右碌既和式房間，享用豐富的「箱根山麓豚がメイン料理の標準コース」之後浸溫泉，開心到呢！(富士山小屋果晚 6,500yen，箱根呢晚仲平 200yen，凡間與天堂的分別…)

浸溫泉前要洗身，在浴場見到個個光脫脫咁擦背沖涼，我地都豁出去，脫！好彩我同寶霖都係勤力讀書之人 :P，唔帶眼鏡就咩都睇唔到﹏﹏呵呵！(但唔用花灑就咁用木桶潑個身總好似唔乾淨咁 >_<！) 另外，個溫泉浸左唔夠10分鐘我就頂唔順了，太熱太 "興"了…行完富士山，我地兩個都解左體，完全唔覺得自己同對腳有咩關係。

第二朝享用過 50 星級的早餐後就拎住張箱根 2-day pass 出發！

塔ノ沢 >> 箱根湯本 (電車)

拎住張箱根 2-day pass，可以坐箱根範圍唔同既交通工具遊覽整個地方，包括巴士、電車、纜車、吊車及專為遊客而設既海盜船等等。如果你無錢食早餐，本人強烈建議先到箱根湯本的手信街，店舖 9 點就開門，形形色色的饅頭、魚蛋、漬物大大舊畀你試食，食到你飽為止再昂首出發。手信街既雪糕都唔可以錯過，300yen/杯，我地呢朝食左3杯… 另外，一定要去消防局隔離的湯もち食三角草餅。

箱根湯本 >> 小王子博物館 (巴士)

箱根的博物館 / 美術館同溫泉旅館一樣多︰雕刻之森、玻璃之森、強羅公園等等，去得呢個去唔到果個，最後因為名氣既關係，我地揀左小王子博物館。原本以為會有好多小王子 figure、故仔介紹咁，但博物館內只主要介紹作者生平，好似對個故仔無咩認識的我地會覺得無咩睇，留左1小時左右便離開了。(提一提，6-7月主館對出既花園會種滿花花，應該會有 D 睇頭﹏)

小王子博物館 >> 強羅駅 (巴士) >> 強羅纜車站 (走路) >> 早雲山 (纜車)

因為唔想走回頭路，我地順路的在強羅乘纜車到早雲山，再轉乘吊車至大涌谷。纜車站在強羅駅隔離，行兩步就到 << 千祈唔好信旅遊書話要行10分鐘！。強羅同早雲山之間的登山纜車全長 1.2 公里，途經上強羅、中強羅、公園上、公園下，每 10 分～35 分發車一次，行程 9 分鐘。纜車最具人氣就係車頭既軌道景色，所以唔好貪果幾分鐘坐，要霸返個好位睇靚景！秋天時仲可以睇到紅葉。 早雲山 (纜車) à 大涌谷 (吊車) 早雲山、大涌谷、姥子、桃源台之間既吊車全長 4,035米，26分鐘車程，右面可以近眺富士山，左面可以斜啤大涌谷，係日本最長既吊車，僅次於瑞士的 Kriens Bahn，勁！ 大涌谷係箱根火山蒸氣爆炸所形成既火山爆裂口，佈滿硫化氫同水蒸氣，一落車就聞到濃烈既硫磺味，沿著石春階梯 "快" 行約 15 分鐘，就到達可以近距離睇清楚噴氣景觀既地方，雖在室外，感覺好似焗緊 Sona 咁，熱到呢！我地兩個都汗流不止。辛苦過後定要獎勵自己 >> 就係大涌谷名物，黑玉子茶屋既黑玉子 (500yen一袋，有 5 粒)，其實只係大涌谷溫泉烚蛋！因為硫磺泉煮過既蛋殼接觸空氣後會氧化，所以變黑，話食一粒可以延壽七年，哈哈，同寶霖各人食左兩粒，嘩！但咁食法，似乎膽固醇會高 D…

為趕及 17:00 最後一班蘆之湖海賊船，我地留左 1 個鐘左右就離開。

姚源台 >> 蘆之湖 (海賊船)

在箱根真可算是上天下海，由桃源台坐海賊船遊蘆之湖到箱根町 / 元箱根港，各港約需 30 分鐘，可以盡情飽覽咩叫湖光山色，在湖中欣賞日落景致，靚到癲！上岸後還可參觀箱根神社、關所等等。總之就玩盡、睇盡、食盡箱根！
返到東京，對腳仍然不是自己的…

~ 有吉詩 提提你 ~

交通︰
箱根周遊票 – 包小田急線來回車票同在區內自由上落 "雀仔" 巴士、登山電車、吊車等七種交通工具，並附優惠券，有效期為 2 / 3天。
http://www.odakyu.jp/tc/freepass/hakone_01.html

入場劵︰
手持周遊票可享有各博物館、美術館門票 100yen 的優惠 << 多到呢！-__-！，但若在箱根湯本巴士站就可現場買到平200yen 的門票，官方的，所以不同擔心。我張小王子劵就用左 1,300yen (原價 1,500yen) 一ノ湯溫泉︰ 集團旗下有好多旅館，不時會有會員優惠，平1/3甚至一半，只要在網上做簡單登記就可免費入會，仲要入住者只要其中一員係會員就得。我地個「一泊二食」 plan 原價 8,500/人，而家用會員資格就只需 6,300yen。 http://top.ichinoyu.co.jp/ http://www.ichinoyu.co.jp/honkan/index.html 手信︰ 箱根的傳統工藝品「箱根寄木細工」係江戶時代後期既傳統工藝品，做工精細，將唔同顏色木料拚埋一齊做成唔同款式的木制工藝品。仲高技巧地設計到好似密盒咁，要 4-20 個步驟先開到。 http://www.hakonemaruyama.co.jp/

家族經營

9月19日係日本敬老日，公眾假期，返夜班的我閒到不得之了，試過半個鐘只得兩個客， D 時間真係過得好慢，返 8 個鐘好似要返個 double 咁…十分恐怖！結果不停同同事傾偈，驚知原來 Owner 有兩個妹，都係響便利店返工，就係我朝朝都見既奧山及宮坂太太，估都估唔到，因為佢地三兄妹由腳指尾兜個圈上返黎睇幾次都唔似樣，而 Owner 既太太就係店既經理，真真正正的家族生意﹏！

另外，原來我有幸響一間每日營業額愈 1,000,000yen 既便利店返工，呢個數字只有響上野、池袋等旅遊爆旺區先做到，而家就響商業區做到咁高金額，實在唔睇得少！

警視庁遺失物センター

如果你唔見野、跌左野可以點？「執返佢！」(如果真係咁簡單就好…)

日本有個警視庁遺失物センター(Centre)，全國警署、警崗接收到既失物，7 天至14天後就會被送到此 centre 集中處理。只需填妥表格，寫清楚你 (1) 幾時響 (2) 邊度唔見 (3) D 咩，同事就會 check 個 database，好有心機幫你響個大海中撈返支針，仲會主動問︰「不如我幫你搵埋呢條線。」

因為唔見相機，我去過個 centre 兩次，有次等緊時見到有人同佢隻 USB 重逢，我當時好想第二個係我成功搵返自己野，可惜﹏可是﹏可悲﹏

~ 有吉詩 提提你 ~

警視庁網站︰

http://www.keishicho.metro.tokyo.jp/index.htm
警視庁遺失物センター︰

地址︰東京都文京区後樂1-9-11 (東西線、有樂町線、南北線、大江戶線、總武線 >> 飯田橋駅落車)
電話︰03-3814-4151
辦工時間︰08:30 – 17:15 (星期六、日及公眾假期休息)

一個人．四個月

一個人的第四個月下大雨，咩意思呀！？

好熱好熱，呢個月充分感受日本夏天既猛暑，日日 34-36 度、天天流住汗瞓覺，咁好既機會應該會瘦，但好遺憾，我既體重仍然無變過，真唔爭氣！另外係因為呢個月好努力的工作，賺左少少錢，一個人有錢就身痕，我止痕的方法就係食好野︰拉麵、廣島燒、蟹、dessert buffet、壽司、蛋包飯等等……結果？當然仍然同個肚腩藕斷絲連~~

第四個月招呼了兩個朋友，分別係竇霖同 Bamboo，狹小的房間勉強擠下兩個人，晚上有人同自己傾偈後瞓覺真係好開心！久違了的生氣﹏同鄭 sir 食晚飯更是一絕節目！讚！

除了 CIFA 交流會，我 9 月開始參加文娛中心 (たづくり) 專為外國人而設既「日本語学ぶ会」同日本人義工傾偈。大會會按參加者的日語程度及需要安排個義工叔叔 / 嬸嬸畀你，一個禮拜見一日，每次 1.5 小時，一對一咁同對方傾偈，咩都可以傾，目的就係不停咁講日文。個個都話我日文講得好 (佢地太客氣…)，但點解返工時無辦法同同事傾到偈既？

工作方面，始終是短期，大家都當我係個過客，有時唔問真係會唔知間店有咩 campaign、discount 等，到收錢果刻先知，有時店長更響我面前同同事交代 D 其實我都要知既野，唉…都怪自己日文唔夠好…「但唔好唔開心有吉詩，你而家賺緊 yen，賺夠又去玩啦！」

8月29-30日勇登富士山

終於等到登富士山既日子，揹上背囊，我變返一個遊客。

富士山高 3,776 米，係日本最高既山，因為山勢危險，每年只有 7、8月天氣較好時 (開山時間) 可以安全登山，以外時間五合目以上既山徑都會被封，所以對於留在日本一年的我，這是個難得的登山機會，便夥拍好友寶霖衝上山！

出發前睇左好多資料，知道富士山由五合目開始有 4 條路上山，分別係吉田口、御殿口、須走口同富士宮口。我地選擇左較多人行既吉田口登山道，一黎因為沿途會有好多小屋可以補給，二黎係因為一架由新宿開既高速巴士就可直到，非常方便。


一早買定 8月 29 日 07:45 由新宿西口直到富士山五合目既高速巴士，同寶霖傾下笑下，差不多 2 個小時後就到達富士急 Highland (好想就咁落車玩！)，在巴士上遠眺富士山，好興奮呀！果時果刻，我地已經到左山麓，巴士徐徐上山，一合目、二合目、三合目…到喇！約10:30就到達五合目喇！！一落車就見一個大廣場，有幾間手信舖頭，好似日本全國有一半人黎左行山咁 >> 勁爆多人，大家響度作登山最後準備、休息、適應高度等。我地都留左個幾鐘，以適應 2,305 米既高度，防止出現高山症既症狀 (但…實情係 D 手信太吸引，我地行左好耐…)。

卒之搞到 12 點先開始登山，開始時是一片平坦的碎石路，有種行兩步退一步的感覺，路既左面係河口湖，右面就係富士山，心諗︰「日本最高既山都唔係好難行啫！」<< (仍然天真的我)。行左半個鍾，「YEE？吉田口？OH，原來之前既係準備入登山道既路，我地而家先叫正式開始登山。」 約 1 小時後，到達了六合目(2,450米)。

由六合目到七合目既大Z路行到我地死，不停Z、Z，好似返工畀老細「娥」咁 – 又長又 “Tsum”！山路滿有火山碎石，非常鬆散，有如響沙灘上行咁費力，好在天氣好加上風景優美，我地一路行一路影相，都唔覺好攰，下午 3 點鐘就到達七合目(2,700 米)，開始見到小屋。在小屋外小休，欣賞如綿花糖般的雲海，咩都抵返晒。 小屋沿山而建，一路上一定會穿插其中，小屋外既露台成為登山者歇腳的地方。同寶霖 book 左高八合目少少既白雲莊過夜，要盡早休息就要快腳喇~~但上八合目既路開始難同斜，仲有好多 "雷打石"，要非常小心，唔係好易拗柴，另外，行 10 分鐘就要呌呌回回氣，挑戰自己呀~~幾經辛苦上到八合目 (3,100 米)，在 16:30 抵達白雲莊。 一入屋安排好住既位置後 (請留意係 "位置" 唔係房或床位) 就食 standard 咖哩飯，都未消化得切就要瞓覺，為既係呌足精神於 01:30 前出發，以趕及 04:30 攻到上頂睇日出。

瞓下醒下，卒之等到 8 月 30 日 01:00 起步，其他登山者亦精神抖擻的摸黑出發，大家的頭燈、手上的電筒形成一條火龍，照亮了直達頂上的山道。因為山道太斜，我同竇霖都小心翼翼，行得好慢，不時要停低回氣，其他登山者亦然，另外係因為人太多，除非對自己好有信心可以兜過人群，唔係都要響 D 樽頸位排隊一步一步上 (終於明白點解要用 4 個鐘上到頂上)。

行呀行…爬呀爬，02:38 到八合五勺 (3,450 米)、03:35 到達九合目(3,600 米)，再響04:29 走至山頂 (3,776 米)！！！見到山頂既鳥居，富士山山頂呀！yeah~！我地搵左個有利位置、吹着寒風等睇日出 – 御來光，那時頂上雖然只有 5 度，但已有300萬人擺好腳架等影相，此時此境，竟然有個女人食煙，幾想揪佢出黎推佢落山！！好心啦！！(>_<) 接近 05:00，天開始變色，見到太陽徐徐昇起，太陽出來了！有人不斷拍照，有拍手高呼，有人嘩嘩嘩 << 呢個係我 J。有 D 趕唔切的登山者都在原地停低睇。在富士山山頂睇日出，確實係我在呢一年日本之旅既重點節目，之前逢二進一的辛苦都唔記得晒，真係咩都抵返。

睇完日出，我地定一定神，發現唔見屬於富士山既標高柱，一問之下…原來我地睇日出既地方仲未係 3,776 米，仲要圍住火山口兜半個圈先到，雖然睇完日出好似完左件事咁，唔想再行，但難得黎到，larn 都要 larn 上去呀！！<< 唔係講笑，成 45 度斜，真係 larn 上去嫁。 完成歷史性任務後，08:00開始落山，見到好多人選擇左面下山道 shur 落山，我地無帶任何補助工具，唔敢好似佢地咁，同埋又唔知會唔會駁得到去出發時既廣場買手信，結果我地選擇原路落山 << 所有睇呢篇 blog又有興趣行富士山既 朋友千祈千祈唔好咁做！！我地行左個幾鐘後發現無咩人行呢條路落山，一問之下，原來唔會有人咁落山，下山道同登山道係分開的，原路落山問任何人都會答你︰「大変だね！」不過，唔行都行左，唯有繼續……(--__--) 「上山容易落山難」有如「世上只有媽媽好」- 永遠是對的，下山道滿布細沙碎石，如浮沙陣一樣，所以沿途同寶霖都唔敢講野，小心翼翼的走，而且我每步的幅度是平時行路的三分一，每步都驚跣低︰「可唔可以搵直昇機戴我同寶霖走…」行呀行、走呀走、落呀落，我地終於用左 5 個鐘，響 13:15 回到五合目，完成了我地既登山之旅。

今次的登山之旅完全係觀光性質，唔急唔趕唔追時間，亦無去年毅行者的辛苦，只是很遺憾的在往箱根的途中唔見了珍貴的相機及更珍貴的 SD Card…喊…慘…

~ 有吉詩 提提你 ~

交通︰
每日都有由新宿直達五合目的高速巴士，單程 2,600yen。如果時間充裕，都可以選擇先去河口湖遊一遊，再轉乘巴士上五合目行山。
http://bus.fujikyu.co.jp/line/sh04.html http://www.tourism.metro.tokyo.jp/chinese_t/tourists/spot/suburbs/fujisan/bus.html

山上小屋︰
由七合目開始直到九合目都有唔同既小屋畀大家休息，一般都無房間，都只係將地方舖滿被舖，每個「床位」只剛剛好供轉身，大家背對背、面貼面咁瞓，有如集中營般，無遮無擋，仲不時聽到鼻寒聲…雖然係1X6呎「床位」，但收費不非，白雲莊就要 6,500yen(包晚餐)，7,500yen (包早、晚兩餐)，超貴！仲要衰到問佢要多杯茶都唔得，但都無辦法，都要休息。 另外，雖然話小屋可以補給，但飲既食既貴到痴線，500yen 一支水，300yen一條 energy bar，咁講返，人地咁辛苦運 D 野上黎....
http://www5c.biglobe.ne.jp/~fujisan/sub3.htm

小屋廁所︰
在山上小屋去廁所要畀200yen，作為清潔費用，就算你住響佢地度都要畀，只不過畀完一次之後就唔駛錢去。20蚊去一去真係唔平，果然，日本咩都貴，哈哈！

其他參考資料︰ http://www.fujisan-net.jp/ http://www.yamanashi-kankou.jp/fujisan/noboro/noboro002.html http://www.fujikyu.co.jp/fujitozan/index.html

消失了的明信片

曾幾何時，明信片是朋友在遠遊時向家人、親友問好的最佳途徑，不但成本低廉，在親筆題字的情況下亦令每張明信片變得異常獨特。我很喜歡收明信片，家中的名信片填滿了兩個 A4 紙箱，每張明信片都充滿朋友旅行時當下的心情；同時因為深知收明信片的興奮，自己都很喜歡寄明信片，尤其現在身處日本，平平地寄明信片比買貴貴手信更化算。呵呵…

然而，面書讓用戶可隨時向朋友 say hi、happy birthday 等，似乎較寄明信片方便，加上 MSN、email 的廣泛使用，漸漸令明信片…消失了…

早年到訪日本新宿都廳、淺草等名景點時，不難找到靚靚明信片，然後在 coffee shop 嘆住咖啡悠閒的向好朋友訴說人在彼岸的珍貴故事，但現在的日本，只能在書局、郵局買一些毫無設計的 “明信片”，無人希罕似的。

是我留於傳統，還是沒法與時並進？

SunKus 百態

在 SunKus 返工幾開心，幾自由，責任不多，只顧收銀，仲要有個好人好傾又有經驗既丁 SAN 帶住，所以有時間望多幾眼客響店既 behavior。

當客人買成人雜誌或 condom，放 d 貨響我面前 bit 時，都會另轉面扮仲有野要揀要買，到我 bit 晒同將 d 貨入晒袋時充會返番黎畀錢，幾好笑。其實都正常既，買 condom 是負責任既表現，你應該好 proud of 自己呢個舉動︰「係呀！我係買緊 condom 呀！」咁先啱！XD

6月27日鎌倉長谷寺繡球花

5-6 月的日本仍然不停的賞花，繼早前既花菖蒲後，6 月尾去左鎌倉睇繡球花。

在下雨天行街賞花雖然煩，但另有一番風 "味"，同由季子同 Samantha 約在藤沢見然後一齊搭我好鍾意既江之電去鎌倉，在八幡宮前巧遇傳統日本結婚式，一對新人含羞答答的接受親人及遊人的祝福。


是次旅程最期待及精彩的就是在長谷寺睇繡球花，但因為人太多，等了一小時才能進場，好在寺院提供 "可再入場" 服務，打個印就可外出再入場，出去等吧！在長谷寺欣賞不同種類的繡球花爭妍鬥麗確是精彩，遊人不停拍照，求祈影都可以好靚。唔知係咪香港唔多見，一條短短既花道都可以行成個幾鐘，不停咁 wah！

~ WingC 提提你 ~

去鎌倉既小田急 One Day Pass 包江之電任搭，可由新宿、新百合ヶ丘、小田急多摩センター、町田、大和出發。http://tabidotnet.blog119.fc2.com/blog-entry-80.html

鎌倉舖頭及寺院一般下午 4 或 5 點就收檔，早 d 出發可以睇多 d、食多 d 同買多 d！

至驚人買煙

終於唔駛個個禮拜打電話 interview，畀心機做好兩份工！

原本以為只返 3 日 Daily Yamazaki，但呢個禮拜返足 5 日，每日 6-8 個鐘不等，因為好忙既關係，時間過得飛咁快，返 8 個鐘好似返 3 個鐘咁。

因為日日幾個鐘不停咁做，普通收錢已經 ok，但令我返屋企仍要補習既就係千千萬萬煙既牌子︰Caster、Lark、Seven Star、Mild Seven、Marlboro、Kool、Kent、Camel 等等，呢 D 牌子中仲要夾雜 Lights、Super Lights、Menthol 等等等等，條數乘起上黎好恐怖。味道…真係咁唔同？

當客人入店望住個煙櫃時我就好緊張，講 no. 還可，但如果講牌子、種類的話，我一係就聽到但唔知隻煙響邊，一係就完全唔知佢講咩…好羨慕隔離既河原嬸嬸好快就攞到盒煙畀客。爭氣呀！林詩詩！

銀行戶口

日本有爆多銀行，初到步的我都唔知響邊間開戶口，經朋友介紹下，選擇左郵局銀行（ゆうちょ銀行），因為係郵局附屬，所以見到郵局如見銀行，好似幾方便，就佢吧！

原來ゆうちょ銀行唔止方便，開戶手續仲異常簡單，對外國人都無咩限制，可以1円開戶，只需提供外國人登錄證（原票記載都得）、印鑑、填張 form 就開到個戶口同有張提款卡。Huh…終於都唔駛為帶黎既錢日日提心吊膽。
然而，房東既戶口係東京三菱 UFJ 銀行，如果我由ゆうちょ銀行過數要手續費，所以我又要開多個戶口交租。UFJ 開戶較嚴，要登錄證，又話要住滿半年，但本住客人永遠是對的既信念，我叫職員無論如何都要開個戶口畀我，無理由咁對外國人既！等等，結果，我當然可以交租唔駛手續費啦！

一個人．兩個月

呢個月過得好快，心情上落頻繁 (都係因為搵工 lor！感恩最後都搵到可以交到租既工作)。

這個月試左好多野，又勁食、再勁玩。在日本做義工，同小六學生玩、似足日劇咁，響學校禮堂集合、做體操；在調布市文化會館免費睇鋼琴 + 口琴 (ハーモニカ) 演奏，久違了的三角琴，令人懷念，第一次欣賞口琴獨奏，精彩絕倫；在涉谷行行下街去捐血，狂飲紅十字會既香蕉、士多啤梨 milk shake，仲要有 HaganDaz 雪糕，漫話任睇，如果香港都係咁做，血庫一定夠血，哈哈！又因為七夕既關係，參加左好多有關祭典，同交流會朋友大食會等等。最特別既莫過於做 U Magazine 既 freelance 記者仔，在日本採訪寫稿；仲有機會接受星島日報既網上訪問，真係好多好多體驗，未能盡錄。

呢個月仲同為左姐姐同自己而努力學習玩 Facebook、send email 既雙親在網上交流，感動！但爸爸仍然傳統的透過文字向我送上家書，眼濕！希望佢地支持我做好呢份工、過好呢一年啦！

好多職員的 Daily Yamazaki

在 Daily Yamazaki 返 shift，個個禮拜唔同時間，等店長決定，返第一日就 chur 足7個鐘，都幾癲。
同事好多，記名記死左，由煮食到樓面，個個都爆好人，係有 d 經驗嬸嬸 pushy 左 d…「唔好 Uum，要 "hai"」︰「Unm… "Hai" "Hai" "Hai"！」型仔店長都好有心機教，又安排我跟唔同人收銀、執報紙等。

間便利店因為在地鐡出口前面，又隣近各商廈、店舖，成日都好多客，11:30-13:00最癲，必要時店長都會叫新手的我行開，等佢出馬。跟住 d 嬸嬸學摩打手 bit 貨、收錢、找贖，wow，有時真係會忙到連個客係咩樣都唔知。
對咁好人既店長隱瞞我在 SunKus 的 part-time，確係有 d 內疚，希望體諒，因為最初如果講你聽，你可能因為 competitor 既關係唔請我，sorly 呀！>_<

ハローワーク Hello Work

外國人響日本搵工，除左每個禮拜從各區搵工書仔眾裏尋它之外，仲可以去專為你同我而設的 ハローワーク(Hello Work) 搵人幫手。

第一次去既朋友要帶 passport、外國人登錄証去做登記，然後攞籌排隊，有如香港既勞工處，ハローワーク既同事會根據你既意願、條件等要求響佢地既 system 度同你一齊傾一齊搵工，搵到啱心水既之後會幫你打埋電話，打到包你有工見為止。最後工作人員會畀張ハローワーク登錄卡你，畀你第日再去時用。

ハローワーク裡面有識英文、國語既人，所以如果你日文唔得既話都唔駛擔心呀。

~WingC 提提你~
ハローワーク開 9am-5pm，最好 10am 到攞籌排隊，呢個時間去都要等一小時，如果你 2pm 先到就唔駛諗，因為要等成 3 個鐘，佢地都收工 luh。http://www.hellowork.go.jp/

遇見後生百樂

在家附近的便利店/居酒屋等的電話都畀我打晒，諗住可以以單車返工，店長會 consider 我多 d (因為佢地唔駛畀車費)，點知天外有天，好多唔請的都話有人比我住得更近上班地點，谷鬼氣！都係要山長水遠出到六本木及赤坂見附一 d 較多外國人聚集的地段搵機會。終於畀我找到第二個百樂…

在赤坂見附的 Daily Yamazaki 見工，店長江平雅俊是年屆 33 的型仔，十分賞心悅目，一入 office 就已同佢雞啄唔斷，傾左成半個鐘有多，係我在這邊見得最耐既 interview，當我話佢聽其他店長因為我係 "外國人" 就唔考慮時，佢好肉緊咁「BaGaYaRu」，^_^！然後佢就突然話請我，開頭都未 get 到佢講咩，因為之前既經驗都係叫我等消息，到我真係聽到︰「你被採用了」的時候，我連續向佢鞠左幾個 270 度躬，勁開心，多謝你，我會畀心機做的。

資料話 900 円一小時，車費每日 600，但店長知道我既車費是 780円，佢問我如果佢畀 950 好唔好 (畀多 d 梗係好啦)。原來公司規定車費只得 600，型仔目的想 cover 我既車支，感動！但我懶係唔好意思咁︰「Oh，點得呢！你地 set 左 900円，你畀 950 我，會唔會有問題？車費唔夠 cum OK wor…」當然最終都以 950 成交 (頭 30 個鐘研修期間 850)。

天窗出版 - 打工遊日本情報書

到日本前，我與另一位日本工作假期的參加者有幸被天窗出版社訪問，將申請心得作為其中內容編輯成書 - 打工遊日本情報書，雖然未有機會睇睇本書，但知道自己有份在書中出現，感覺很興奮，話唔埋自己都可以出返本，哈哈！

本書100%香港製，由身處日本的筆者編寫，含豐富內容，包括到步後搵工必殺技、住宿安排等等，當然都有我同大家分享既申請貼士 (^_^)。本書絕對適合成功申請及準備出發之參加者。當然，非日本工作假期參加者都可以買黎睇下啦！

黑仔見工週

好慘呀！呢個禮拜見工真係頭頭碰著 Dark，不禁問左幾次神︰「神呀，點解要咁對我，係咪開始考驗我？如果係的話，輕手 d 得唔得？」

話說今個禮拜有 3 個 interviews，星期一到三日日都有，7-eleven X 2同 am-pm，理應感恩、開心及滿足，但黑到禮拜三的我，終於忍唔住熱淚盈眶。究竟點黑法？

每次 interview 之前我都會查清楚公司地點及前往路線，同早到少少準備心情，但 7-eleven 分店太多，隔兩條街就一間。我去到以為係 "目的地" 既 7-eleven話黎見工，但回覆竟然係「我地無請人」，再睇地圖，原來我要去既 7-eleven 仲有一丁目先到，剩返五分鐘，在大雨中狂奔，結果喘住氣、濕住身咁見店長，唉！

星期二晚上我照去見第二份 am-pm，距離屋企只有 6 個站 (15分鐘車程)，但我用左差唔多半個鐘先到，點解？因為 delay！！lay 左成10分鐘，到達後我即飛奔去便利店，死黑仔又再次出現﹏當時我只遲1分鐘，但 am-pm 個鐘竟然快左10分鐘，店長一定以此為準，我無即時解釋費士有藉口，因為我確係遲到，唉、唉！！

到星期三早上，我預早1小時踏單車去見第三份7-eleven (9:30am)，因為無路繼續的關係去左搭車，3個站只需6分鐘，但…又出現 delay，班車遲左成 3 個字，OMG！失晒預算，到達後即問人點行，但心知不妙…最後，夠鐘了，仍未確定 7-eleven 位置，遲到了，9:35 仍在車站附近徘徊，無奈的放棄了，在日本第一次 Miss interview，唉、唉、唉！！！

~WingC 提提你~
出名準時的日本亦會馬有失蹄，見工預早兩班車時間會較穩陣。

畀人收左單車．罰錢…

勁唔開心，為左趕車去見工，泊架單車響麥當勞門口，返家時竟赫然發現畀人拖走左…要用2,500円攞返，真係好唔好彩…因為個個都係咁泊。點解要係我？？

唉…慳就慳 1、200，駛就駛1、2,000，入肉呀！唔制呀！神呀，你係咪有咩特別安排呀？？

狂打電話．日日見工

到步後的第五週一個禮拜見 4 份工，真係在日本呢一年先至經歷到。

3 份便利店、1 份超級市場收銀，後者要做埋 test，10 分鐘內心算 200 條數，雖然只係簡單加減，但我只做到103條。好緊張嫁！

經過眾多搵工失敗的經歷，人在異地的我漸漸失去鬥志，亦變得揀擇，而自以為邊 d 工機會大 d ，邊 d 諗都唔駛諗，慳返唔駛打電話。撈到幾份肯見就收手，唉…但見黎見去都係得個吉，而電費、水費單又逐一向我招手，呀！急呀，點算好？>_<

SunKus的一職

話說我畀人炒之後果個禮拜就畀六本木一丁目 (距離屋企成個鐘車程) 既 SunKus 便利店 (同日本 CircleK 同一個集團) 請左，收到電話既一刻開心到死，雖然只做星期六晚上 5 個鐘，唔夠交租，但神既供應係夠我用既 > 賺生活費。

返左 3 個禮拜，同副店長、黎日本讀左 4 年書既大連女仔 (丁さん) 一齊開工，兩位都好好人，但完全未做過收銀 + 執貨既我，第一日返工有點吃力。副店長用左 10 分鐘同我講點收錢、人地黎交水、電、媒、電話費要點做，仲有記煙既牌子、賣各式各樣既儲值 card 等等…收銀真係唔止 bit、bit、bit 咁簡單。
返工有唔識、做錯、做漏野既時候，但有工返既感覺真係好好，六本木 d 客都好好人，知我新黎都叫我「頑張って」，呢排世界杯日子，得閒仲可以同佢地吹吹水，時間過得好快，捽一捽眼就 5 個鐘，希望我既表現 ok 啦。

~WingC 提提你~
在日本返工，見店長要叫店長，唔可以直呼其名，加さん都唔得！記住呀！
見完工等消息時，記得入左個電話號碼入手機，一旦間公司打黎都可以知道係咩公司打返畀你，千祈唔好好似我咁樣衰，聽唔到又唔好意思叫人講多次，結果響 d 打過既電話之中搵返間 SunKus 出黎 (好彩搵到，唔係就死得，雖然…可以打返去問，但都夠樣衰啦！)

Part-time 都要見 Panel?

雖然 keep 住失敗，但感謝神，在日本仍 keep 住有見工的機會，計計埋埋都見左差唔多廿份工，都係便利店、餐廳、飯堂等等，帶黎既證件相已經用晒，真係響香港見工都無見得咁密。

呢度好興搵株式會社幫手請人，特別係大廈或酒店清潔工，都正常既，但我點都估唔到應徵 part-time 都要見 panel﹏

見間龍鳳中國餐館，佢響搵工書仔列明如果是外國人應徵的話就點點點，心諗可能會 consider 外國人，所以即打即見。去到位於地牢既公司見兩個西裝人，嘩，駛唔駛咁緊要呀！緊張﹏傾左 20 分鐘，又係等消息，其實我都知佢地唔會請，收人錢幫手請人，請個有責任感、做到野、又親切、又有熱誠…但！日文唔流利既話，會畀人 gut，如果係我都唔會請菲傭姐姐去見客。

出發前，朋友、家姐都話可以試下響呢邊教琴，留得一年，有 d 難…但我都攬住一試無妨既心態試間有 Tom Lee 規模既 "宮地樂器" 見 reception，可能佢地會 consider 我在香港 7 年既教琴經驗 wor << 太天真了。去到小金井，有三個人見我…um…有 d 似後生版陳永仁見 board 咁，呢下真係超緊張 (盡力表現自己啦！)。雖然三位都好好人，但主任砍頭就話因為 reception 要見人，請外國人有 d 難度「ちょっと…」，又話我留得一年，教小朋友又有難度，又「ちょっと…」，哎呀呀嫂，你唔係唔知我來自香港，完全唔考慮就咪叫我黎見啦，唉！

好掛住琴行既 buddy 同學生仔呀﹏(雖然佢地聽我走一 d 唔捨得既感覺都無) >__<

6 月 16 日花菖蒲を観る会

4-6 月是日本人賞花的季節，我都同在 CIFA (調布市國際交流會)認識的嬸嬸叔叔去明治神宮個花園賞花 - 花菖蒲。

約 10am，我 9:45am 就到，在日本約人真係真係真係…唔敢遲到，大部分參加者都在 9:55am 到達，領隊在這個時候就打電話畀仲未到既朋友，而佢最後都在 58 分到達 (嘩，響香港未夠鐘你都唔好打，畀人鬧死︰「喂！而家 10 點喇咩？我未到係因為我準時！趨趨趨…」)。

剛巧今年係明治神宮鎮座 90 年，又係賞花既好時間，遊客特別多。沿途同團友閒話家常，又死跟住領隊長澤先生聽講解，猛咁「すごーい (勁呀！)」

當年住響神宮既天皇會在花園一間獨立屋仔靜思，屋前面其實只係得 d 好簡單既花草同個荷花池，已經話好~~~靚，相較我國蘇州等地既園林，佢地真係未見過大蛇屙尿﹏

安花菖蒲英文名是 Iris，又叫鳶尾花 / 蝴蝶花，有六塊花瓣，三塊向上、三塊攤開瞓低，日本既 Iris 叫 Beardless Iris，向上既三塊花瓣較小。一大片花菖蒲田，又幾靚 wor！





欣賞花花後成村人去食飯，個個有所準備，好得意，在日劇中常見既情景出晒黎，大家既飯盒 >>> 餸菜一舊一舊排得好靚，有人請我食酸梅飯團，佢好闊佬 jut 成粒酸梅在飯中，酸到我即刻「食左酸梅變超人」。~(*v*)~

~WingC 提提你~

交通︰明治神宮在山手線原宿站，一出就係，靜靜的洗滴完心靈又可以去對面既竹下通或表參道享受駛錢既樂趣，哈哈！
明治神宮中央花園︰入場費 500円，如果團體夠 20 人就 300円，所以不妨同其他遊人 group 埋一齊入場會抵 D。

垃圾分類的藝術

第一日入屋就見到一袋二袋既垃圾，係呀，日本扔垃圾要分類，日日唔同︰可燃、不可燃、罐、發泡膠盒等等 (鬼知咩係可燃唔可燃咩…)，分好類就按日子扔去屋外既收集箱，每日都有人去收，但唔好意思，星期六日係咩都唔收的﹏

心諗，係咁儲住 d 垃圾，夏天咪好臭？好大獲 wor，但呢幾日又唔覺 d 垃圾臭，room-mate 仲話住左咁耐，未見過ゴキブリ(甴曱)，huh…都有諗過將垃圾扔去 7-11 等便利店既垃圾筒，但你諗到既野人地一早就諗到，仲寫明「請認真考慮是否真的將閣下之家中垃圾扔在此垃圾箱」(即係好婉轉咁叫你唔好咁做)，有 d 仲會表明有 surveillance 望住，睇你仲敢唔敢扔。

日本街頭汽水機最多，旁邊一定會放個專收膠樽、汽水罐既膠箱，呀，但又唔見普通垃圾筒 wor。在大型超市仲會有各種垃圾分類箱︰奶盒、汽水罐、裝蛋既膠盒都有得分類，勁呢！

在日本買野下下都會有膠袋，咩都講包裝，發泡膠使用量驚人，垃圾分類是否想令自己既唔環保習慣黎得更應該？

~WingC 提提你~

上面講果 d "可燃垃圾"係要用一 d "可燃膠袋" (啡色) 袋住去扔， "不可燃" (藍色)一樣 (哈哈，有 d 似麥兜用雞包紙包住隻紙包雞… >_<)，一般雜貨舖或超市都有得買。特登買野黎扔，sai 錢！簡直痴線！

一個人．一個月

時間實在過得好快，在日本生活已有一個月，漸漸適應了這邊的生活，亦慢慢融入日本社羣，包括踩單車周圍去、打招呼唔揮手只點頭等等，而為了盡早讓雙耳習慣日本人說話的頻率，日日電視撈飯不在話下，聽日文歌、睇日文小說已成茶餘飯後的活動，亦積極參加交流會同日本朋友傾偈，但目前的我對理解日文仍存一定問題，仍只停留明白30% 的水平，會話更差… (>_<)，確實有點吃力。

這個月的生活讓我發現原來我很怕一個人，缺乏安全感，亦沒有朋友眼中咁有 gut 屎。一個人生活，對我黎講 physically 是可行的，我享受一個人去散步、去觀光、去旅遊，但隨時間過去，我開始掛住屋企、家人、朋友、公仔、用5蚊就可以食到既惹味魚蛋、仲有用幾蚊就可以由呢度去到果度既地鐡/巴士等等。

好感恩，落地後既各樣申請手續都進行得好順利，亦得到唔少朋友既幫忙，黎左一個月就已經有兩份工 (雖然第一份做唔夠一個禮拜就畀人炒)，但亦很怕就只有一份工、一份唔夠畀租既人工，我並非怕唔夠錢駛 (其實都有少少係…)，只怕經歷不多，就咁白過一年。好多 interviewer 都問我呢年在日本既目標係咩 - 「講好日文、搵工賺租、旅費、體驗日本人既生活…」但似乎在這一個月所得既同呢 D 目標仲有一段距離…

但唔黎都黎左，就衝吧！去吧！頂住吧！

都是 Coffee Shop

呢個禮拜有兩個 interview，都是同咖啡有關，一間是規模好大的上市株式會社 – キーコーヒー(Key Coffee)，另一間是集團式連鎖 Cafe – カフェソラーレ(Cafe Solare)，前者 in 賣咖啡豆，後者則見接客 (waitress 呀…！)。

我對咖啡沒有特別感覺，就算在 StarBucks 都只會點 Berry Freppachino，去見賣咖啡豆既工作，似乎有點兒那個，更是一個挑戰，為左讓自己在短時間內認識咖啡，扮到好識野咁，在家狂睇 Key Coffee 既網，記熟佢既 product，仲有咖啡既基本知識︰'帶酸'、'帶苦'、'多可可' 等等，實行要好似陳豪咁 Per Fat Tor~!

早到 15 分鐘，坐低就開始喜歡間 shop，兩個樓面嬸嬸好親切，沖咖啡哥哥仲請我飲左杯 Drip-on，Manager 姐姐更是好人，佢知道我來自香港時就 "hea?" 左一聲，好出奇咁。我表現得好真誠，雖然講野講到一舊舊，但佢仍以好 respectful 既態度聽我講野。每次 interview 後都希望成功，不過真係唔敢 expect 咁多，知道自己在電話裡呃到人，就夠開心了 (ei…因為背住對白咁打電話 :p)。

呃到人夠開心，遇著靚仔 interviewer 更是過癮，去府中 Cafe Solare，嘩，負責人助川先生好斯文靚仔，10 分鐘既 interview 完全唔理句子啱唔啱文法，係咁介紹自己，最後我多謝佢時忍唔住同佢講佢好型，唉…衝動左少少，可能搞到唔好印象 -__-''

如果兩份同時請我揀邊份好呢？呵呵呵！(um...諗多左添 :P)

6月6日高尾山

畀人炒，唔開心，但仍然要生活、要搵工，我選擇做呢樣野之前去玩充充電，讓自己揮走失業既陰霾。同新認識既日本朋友 - 由季子同來自新加坡的留學生Samantha (サマンサ)去行山 - 高尾山。
初時覺得家住飛田給遠離新宿好唔方便，但慢慢發掘周遭既市就發現我果頭都好精彩，有不少 shopping mall (響裡面既 supper market 試食勁開心！)，仲要同呢座東京都內出晒名既高尾山距離咁近，正呀！

高尾山在日本人眼中有如香港既南 Y 島，得閒就會去行下，山區內有 5 條登山步道，都舖得好靚，當日我見到唔少人著牛仔褲同 high-heel 行，仲有 D 著短裙仔，heehee 我都只係著住對 con 屎。高尾山高 599 米，可看望到東京、富士山，甚至横浜…話…。　　　





由季子同サマンサ好好，知我日文唔好，都慢慢講，雖然話題唔多，但大家都溝通到，好開心，不過由季子就慘 D，成日要估我講咩，又要將我 D 單字轉化成 '明able' 既句子理解我講咩，ありがとう！

除左出名既藥王院，遊客最嚮往就係山上既美食︰天狗 (佛教山神) 燒餅、とろろそば、軟雪糕等等，仲有爆多既手信，如果要試晒，就有如在 Island Shangri-la 食一餐三個鐘既 buffet >_< 。回程時，由季子同サマンサ都攰了，選擇搭纜車落山，其實我是唔想坐的，因為好貴 - 單程 470 円 (同埋…上山唔搭落山搭？)，但…唔緊要啦 :)。

聽講高尾山仲係東京最受歡迎既紅葉觀賞勝地，咁近屋企，秋天會黎多次！




~WingC 提提你~

由新宿經京王線到高尾山口站最經濟實惠，都最方便，搭半特急列車(準特急)，車程約 50 分鐘，只需 370 円。如果坐 JR，可由新宿姐經中央線到高尾站(車程約 50 分鐘，540 円)，然後轉搭京王線到高尾山口站 (2分鐘，120 円)。

另外，山上寺 + 舖頭約下午 4 點就收檔，如果想買手信就要早D出發喇！

http://www.keio.co.jp/chinese_t/local/takao.html
http://www.tokotoko-takao.info/

外國人登錄証到手

等左兩個禮拜，外國人登錄証終於到手，即刻做埋張印鑑登錄証，盛惠 400 円 (各 200 円)。huh…銀行戶口搞掂埋，無錢響屋，唔駛再提心吊膽，哈哈，其實我都唔係帶左好多錢，自己攞黎驚！





~WingC 提提你~

兩張証有如身份証，唔帶 passport 都要隨身攜帶呢兩張証呀！

日本有爆多銀行，但身為外國人既我地如果唔係留學生或者有咩特殊身分，申請戶口會有一定困難，銀行一般都要求我地住滿半年後先可以申請。在眾多銀行中，ゆうちょ銀行 (見郵局就可攞錢) 制度最寬鬆，show 呢兩張証就可即刻以 1 円開戶。

5月30日的新宿花園神社大祭

星期日返完教會，在新大久保買零食，行返去新宿搭車時，畀我撞到花園神社大祭！yeah！

花園神社位於新宿既正中心，睇返 reference，佢係從江戶時代內藤新宿開始，為左祭祀鎮守接到既神靈而建造既神社，日本人更將之稱為「新宿鎮座」 (好似幾勁咁 wor！)。擁有 300 年歷史既花園神社每年都會響 5 月 28 日前後既星期六或日舉辦例年大祭典，今年就咁啱畀我感受到大祭既氣氛！

大祭典以遊行為重頭戲，超爆多人抬住高 3 尺、重 1,500 公斤既本社神轎，從神社出發，沿靖國通、新宿通、明治通 "Orshu Orshu" 咁遊行，好有氣勢。參加大祭既男士會穿上傳統底褲，即係得一條布好似相撲選手咁 "群" 住重部位，所以沿途都會見到唔少八月十五 …>_<…





除左抬橋之外，最吸引我既就係神社內既「食到你窮」檔，燒餅、炒麵，形形色色，當中最令人嘆為觀止既莫過於大粒網球章魚小丸子，"舊" 章魚大到令你好甘心用 500 円買一盒黎享用，Oishii~!





神社面積唔大，但日本神社既紅色鳥居、木繪馬同日本獨有既「御守」 都可以見識到。除了大祭典，神社仲會舉辦古董市場、舞台表演等活動，新宿都唔係只有 fashion and fashion 既…

~ WingC 提提你 ~

花園神社地址：東京都新宿區新宿5-17-3

唔食都要靚！

朋友一聽我黎日本就話「放心，你去完日本皮膚一定會改善，頭髮都會 bling bling d、滑 d」，我信gah，因為日本食野一切還原基本步，食生野，唔落防腐調味料呀 mah，點知我既信念同我個nose既表現唔成正比，黎無耐就出左一粒大瘡，仲要係 interview 果兩日出事，救命，究竟大瘡幾時先會離我而去？？

諗極都唔明，響呢段時間我都無食煎炸野，又因為無錢 > 食得好慳，味噌煮菜+飯，點解會出一粒有兩個頭既瘡瘡呢？唉…！

因為設備唔夠完善，自己都唔敢jit 佢，驚有 “啦”，唯有用茶樹油頂住，不過，好勇鬥狠既瘡瘡無諗過要榭，我實在睇唔過眼，去左藥房買暗瘡膏，頂！死慳難慳結果就慳左響一支價值 850 幾円既暗瘡膏上 (好肉痛呀，可以買 10 盒生果啫哩 / 5 包著片 / 好多包糖等等 -_-")，無計…尤其身處日本，唔食都要靚，唯有遲d先食拉麵、壽司啦。無效既話你間舖頭聽執啦！ >_<

黎得快．去得快的工…

我未做過 waitress，頂多響屋企幫家姐遞下水、幫呀媽開枱食飯咁，所以開工前既禮拜六、日，借左餐廳既Menu返屋企溫，有難度 …>_<…

我同另外一個內地女仔一齊做，由掃地、準備前菜、落單、出菜、收錢到洗碗都是一腳踢，餐廳主要做附近上班族生意，加上日本人習慣早食飯，開工無耐，就由 11:30 忙到 14:00。雖然我學野快、做野醒 (哈哈哈…)，但客人多時都會好易亂了調子，透不過氣，唔知做咩先。

有野做時就覺得時間過得好快，4 個鐘咁就過左，收得工！第一日在日本返工，感覺好刺激，但無想像中咁多機會講日文，最多係︰いらっしゃいませ (歡迎光臨)、ご注文は (點咩菜？)、失礼します (唔好意思)、少々お待ちください (請等等) 同 どうもありがとうございます、またよろしく (多謝，歡迎再次光臨)。



明明做得好地地，星期三 day off 時 (因為要參加日語交流會，同店長傾好一個禮拜只做 4 日)，我唔知另一個女仔做左 d 咩，老闆叫我第日唔駛返工，仲話我地唔能夠一個人 handle 工作，又話唔可以下下星期三請假。哎呀！？有無搞錯，你都無畀機會我自己做又知我唔得？另外，明明講好只做 4 日，唔記得呀？本著我唔服輸既的本能反應，我同佢講畀我試多日。

詳談之下，經驗係其中一個因素，另外係因為我交通費太貴，所以唔用我。為左錢，畀我講到做星期六8個鐘，點知呢個 "你老闆" 一時一樣，反口覆舌︰「都係我自己跟返就得，你星期六都係唔好黎，唔好意思。」因為佢咁既 behavior，加上鍾意同人理論既我…最後不愉快收場。

失業了，我又再過慳得一円得一円的生活，出街不停周圍望，電話打不停。

畀人炒有點失落，影響左搵第二份工的心情…窒住窒住 gum。

嘗試想開點，已是很好的開始…賺左少少錢，仲有畀人炒既經驗
正呀！咁先係 Working Holiday！

東京都區 1 Day Tour

身為遊客梗係想用最平既方法去最多既地方，慳最多既錢同睇得最多野，至正既就莫過於攞住張任搭車飛周度去，結果我選擇左值 730 円既東京都區 1 Day Pass。

自己一個無咩 plan，張 pass 可以去邊就響邊落，上新宿都廳、同涉谷忠心秋田犬合照、感受國際化品川站的氣派、名店林立的銀座、既築地漁市場、上野公園、遇上無啦啦有工見既新橋、重遊淺草仲見世、腳軟地抱擁東京鐡塔等等。大部分既地方我幾年前都去過，今次得自己一個，有點寂寞，但不見令人落寞。

日本人好叻，佢地會好慷概的畀少少甜頭你然後換取幾 10 倍既回報。話說我入左間雪糕店試食款最新既蜜瓜味雪糕，好大的一匙，同自己講已經夠喇，但結果我買左兩大球… But 真係好滿足嫁！



睇電視睇得多，成日覺得築地漁市場會有好多舖頭賣魚生之餘仲會請你試食 (好似我以為廟街既相士會響你行過佢地檔攤時 "贈你幾句" 一樣，但事實都唔係咁既？！唉…唔通真係經濟唔好？

我張 pass 唔包淺草，但我死都要行過去，今次你個 "雷門" 燈籠唔維修喇嗎？(幾年前佢真係成個被拎走去整！激死！) 在淺草時已知道有份工，好開心苛包鬆鬆地買左 d 手信。

晚上去左東京鐡塔感受自己一個都有既另類浪漫，原來鐡塔有兩重閃法。







~ 醒 C 提提你 ~

呢張 pass (Tokyo Metropolitan District Pass) 只包 JR 線既站︰新宿、池袋、日暮里、上野、秋葉原、神田、東京、兩國、品川、涉谷、原宿等等，想去較多較出名既東京景點如屬於 Metro 既銀座就去唔到，Chris 癲．L suggest 你買值 1,580 円既 Tokyo Round Tour Ticket，包晒 JR 同 Metro << 不過，一日玩唔晒嫁~

另外，大家要記住，去東京鐡塔唔係響東京站落的 (有如旺角警署唔係響旺角一樣)，我響東京 JR 行過去，遠到呢！有如毅行者時行第 9 段一樣，行極都唔到，全憑意志先可最終目睹東京鐡塔的美。

突如其來的驚喜 – 搵到工喇！.

雖然話要暫時放低搵工既壓力走去玩，但對眼始終要周圍望，睇下唔同既餐廳、便利店會唔會有請人招紙，因為咁我有幾日出街都袋住我既 profile 同 resume，諗住隨時有幾會見，點知，偏偏今日…偏偏係今日 (東京1 Day Tour) 就無帶… >_<

我去到新橋一間叫 "香港屋" 既中華料理餐廳，有 900 円請樓面既招募，但無電話，梗係唔放過任何可以令自己買更多零食既機會，因為老闆不在，留低電話、可工作時間等資料就繼續去玩。去到上野，omg，"香港台" 打畀我，問我可唔可以即見 (梗唔得喇，我人在上野… 另外就係我無帶 resume、無化妝，仲要生左粒大瘡…點見？？大嫂，樓面呀，講玩咩！)，結果佢話咩都唔駛都得。半個鐘後，我又返去新橋見工，好彩有張 1 Day pass。

老闆係上海人，都係問工作時間呀，有無經驗呀咁，用普通話傾左 10 分鐘左右，然後老闆問我︰「日文行不行？」「大丈夫です。」(唉！Chris癲．L 呀 Chris癲．L，人地用普通話問就正正經經用普通話答啦﹏) 因為我一句 "大丈夫です"，我地又傾多幾個字 (用日文.…)，超緊張 >_<。呀？佢仲拎個 Menu畀我，問我識唔識讀，Oh…真係唔識 wor︰ "春雨" 唔知係粉絲、 "ニラ" 唔知係韮菜等。但唔緊要︰「你預算 "時給" 幾多？」(乜你唔係寫左 900 円咩？) 「下個禮拜一，10:30-14:30，兩個禮拜試用期，有無問題？」梗係無問題啦！多謝！

Heehee，咁我就有份工響手，餘下既東京 1 Day Tour 好放肆…買野，忍左好耐的生果啫哩！成晚係咁笑，呵呵呵！

﹏我地呢班打工仔﹏

日本地鐡站逢星期一/每月第一個禮拜 (因應招聘公司而定) 都會免費派發搵工雜誌，似香港既 Job Market、Recruit 咁，有好多長工、part-time畀你選擇，但 d 人搵工好似餓狗搶屎咁，好多工星期二打去都已經話請左人，鬼咩，聽我 d 「日文」就知我唔係本地人，係唔係都話請左人先。



另外，好多居酒屋都會直接響餐廳門口寫「ホール募集」(即係請waiter) 或者「スダッフ大募集」(即係勁請 staff)，行開街不妨留意下，順便抄埋個電話打。

呢度搵工唔興 send email，興打電話先，有 d「担当者」(負責人) 會要求郵寄「履歷書」再決定見唔見；有 d 透過電話就對你有興趣，然後約你面試，到時先拎埋份resume又得。即係話響電話講到口窒窒，就咩機會都無，無得翻兜。

度度地方搵工都要求 resume，日本當然都唔例外，佢地最鍾意整潔規範，填resume 都有特定既格式，呢 d 全國認可既「履歷書」可以響 7-11 或 100 円店買到，105円至115 円不等，每疊有 4 份 form，仲有 guide 畀你跟，依足指示填就唔會錯，但日本寫年份時仲興用年號，「履歷書」guide 只有 "昭和" 年號，"平成" 或其他就要自己數，都幾頭痕…

記得記得晒定證件相 (1-2打)！

面接

打左好多電話，唔係話請左人就話唔要外國人，雖然有點灰心，都要繼續搵，卒之有人肯見我，仲要有兩個機會，好開心呀！

尋日去左新大久保一間連鎖式Café "ガスト"見店長，準備左 resume、passport、相，最重要帶備我上報紙既報導，有機會就 sell 下自己。因為係應徵 waitress既關係，我事前上左佢網站睇資料，記熟餐廳既 menu，無死！去到餐廳同自己講要微笑，點知呀店長 "夏超" 型同靚仔到我唔駛記住都係咁笑，完全唔理 grammar 咁同佢傾偈。

今日就去到東京日本橋一間中華料理店見，無靚仔，換來一個好人嬸嬸，我同佢講做樓面同廚房都得時，佢就問我煮麵得唔得 (普遍公仔麵當然無問題，但佢做個人地舖頭煮雲吞麵時既拋麵姿勢…)，即時口窒 tim，好野呀嬸嬸！

我梗希望佢地請我啦，咁靚仔﹏但平常心，當練習！感恩有好既開始！

加油！！