﹏我地呢班打工仔﹏

日本地鐡站逢星期一/每月第一個禮拜 (因應招聘公司而定) 都會免費派發搵工雜誌，似香港既 Job Market、Recruit 咁，有好多長工、part-time畀你選擇，但 d 人搵工好似餓狗搶屎咁，好多工星期二打去都已經話請左人，鬼咩，聽我 d 「日文」就知我唔係本地人，係唔係都話請左人先。



另外，好多居酒屋都會直接響餐廳門口寫「ホール募集」(即係請waiter) 或者「スダッフ大募集」(即係勁請 staff)，行開街不妨留意下，順便抄埋個電話打。

呢度搵工唔興 send email，興打電話先，有 d「担当者」(負責人) 會要求郵寄「履歷書」再決定見唔見；有 d 透過電話就對你有興趣，然後約你面試，到時先拎埋份resume又得。即係話響電話講到口窒窒，就咩機會都無，無得翻兜。

度度地方搵工都要求 resume，日本當然都唔例外，佢地最鍾意整潔規範，填resume 都有特定既格式，呢 d 全國認可既「履歷書」可以響 7-11 或 100 円店買到，105円至115 円不等，每疊有 4 份 form，仲有 guide 畀你跟，依足指示填就唔會錯，但日本寫年份時仲興用年號，「履歷書」guide 只有 "昭和" 年號，"平成" 或其他就要自己數，都幾頭痕…

記得記得晒定證件相 (1-2打)！

面接

打左好多電話，唔係話請左人就話唔要外國人，雖然有點灰心，都要繼續搵，卒之有人肯見我，仲要有兩個機會，好開心呀！

尋日去左新大久保一間連鎖式Café "ガスト"見店長，準備左 resume、passport、相，最重要帶備我上報紙既報導，有機會就 sell 下自己。因為係應徵 waitress既關係，我事前上左佢網站睇資料，記熟餐廳既 menu，無死！去到餐廳同自己講要微笑，點知呀店長 "夏超" 型同靚仔到我唔駛記住都係咁笑，完全唔理 grammar 咁同佢傾偈。

今日就去到東京日本橋一間中華料理店見，無靚仔，換來一個好人嬸嬸，我同佢講做樓面同廚房都得時，佢就問我煮麵得唔得 (普遍公仔麵當然無問題，但佢做個人地舖頭煮雲吞麵時既拋麵姿勢…)，即時口窒 tim，好野呀嬸嬸！

我梗希望佢地請我啦，咁靚仔﹏但平常心，當練習！感恩有好既開始！

加油！！

千葉．幕張

黎到日本，生活指水高，又未搵到野做，樣樣都要慳，對價錢變得特別敏感，聽到有野唔駛錢時就更加興奮。
朋友畀左張免費exhibition飛我，問我去唔去，當時我畀 "免費" 兩個字遮住左我對明亮既眼睛，連響邊度搞、有關咩都唔知就話「去！」點知原來係去到無雷宮參加 Naturally Plus 既 New Biz Event，sell 野…

山長水又遠搭車去千葉縣東京灣沿岸一個叫幕張既地方，一個鄰近東京都既商業區。據資料顯示，幕張係日本政府80年代末填海得來既，作為高度現代化的商業區，幕張設有大型會議中心、展覽館、購物餐飲中心、棒球場及海濱公園等，仲有勁多外資公司響度落腳，Um…簡單黎講，一般遊客係唔會特登黎呢度…你會唔會專登走去 Cyber Port 參觀人地公司？唔通成日都有阿凡達睇咩！？





不過，幕張展覽館 (Makuhari Messe) 係有 d 料到既，佢係繼東京國際展示廳 (Tokyo Big Sight) 之後，日本第二大既會議展覽中心。例如，一年一度既東京遊戲展、東京汽車沙龍及一年兩次既東京汽車展都係響呢度搞，當然都不乏演唱會。

唉…如果係睇演唱會就好 luh，點知係聽人地點 sell 自己間公司，又有員工 / 用過 Naturally Plus產品既朋友分享，內容已經悶到飛起，更何況係我呢 d 懶係要扮識聽日文而唔要耳機翻譯既人呢，結果係 "中" 左兩下同早走…



來回用左我 1,600円 (~$130，睇幾套戲都得！)，真正的貪字得個貧，唉…！

永不放棄

去鎌倉玩得好趕，換左個袋、整好三文治就出發，距離開車時間 (11:05) 仲有20分鐘，但我都急步想快 d 去到車站增值，拎個銀包增值時，呀！shit！頂！damn！馬鹿！無帶張 Suica Card！我掂可以10分鐘來回屋企同車站？搭 11:18 果班？(唔得wor，貴原本路線 20 蚊)；逐程買飛？(唔得 wor，轉車得1、2分鐘，掂買得切？) 呢兩個問題我諗左兩秒，結果我選擇跑返屋企。

跑呀跑呀跑，跑左5分鐘返去，望望時間，再考慮去車站方向有斜路，點趕得切？喘晒氣、正想放棄時，夏韶聲出現︰「永不放棄…停住眼淚鼓起勇氣…」考A-Level 讀Geography 讀通頂時都係佢令我繼續 Mark 大眼 (現在的我唔鼓勵人通頂)，結果，我唔放棄繼續跑…趕到呀！！入到車呀！！原來真係可以10分鐘來回屋企同車站。(點解我黎果日行左成個鐘？>_<)

PS舊年開始跑步係有用既…仲有…多謝夏韶聲！:P

今生之中許多喜與悲 或是一切絕望與新機
通通因我當初有了自信 誓要達到目的地
* 好比飛機孤身天際飛 定立方向基於信與所知
七分本領三分靠運氣 沒法遇見目的地 *
世界變遷我也許不顧忌 現實玩弄不免叫我心痛悲
經多少次衝擊叫我受氣 淚也滴滿了地偏偏我不放棄
停住眼淚鼓起勇氣 永遠奮鬥就似沒有盡期
我跌下再翻起永不放棄 人面世事心中永記
苦楚之中找到新的趣味 我更是不肯放棄
(我更是有朝氣) 不肯天真去計劃前路
但是亦不再擔心跌了不起 種種轉變迫使我去面對
絕無話去躲避
Repeat *
有更重壓迫我也輸得起 闊步前往方知一切都美
奮鬥結果永不可預期 信心卻打不死
永不放棄鼓起勇氣 永遠奮鬥就似沒有盡期
我跌下再翻起 永不放棄心中永記

鎌倉．江ノ島

搵工搵到無晒心機，一早屎忽痕去鎌倉同江ノ島玩，因為毫無準備，唔知點去，room-mate 呀 Wing 介紹我去 Yahoo! Japan 搵路線資料，只要輸入出發、目的地同出發時間就會彈出幾條路線畀你揀，超方便，梗係揀最平果條啦！

鎌倉係日本源倚賴朝開創鎌倉幕府既地方 (類似唐太宗開創貞觀之治)，朋友話，如果你鍾意睇日本寺就去鎌倉啦，無錯，呢度寺廟多過 7 仔，感覺好舒服、好寧靜，1000 幾円車費，幾大都行慢 d… :p。

到步後先去 information centre 攞張地圖同參考下行寺路線，由 2 個鐘到 5 個鐘不等，但以我既經驗，係唔會有可能跟到張免費、無咩清晰路既 map 行，唯有跟人行…，行到邊睇到邊，有時都可以睇下燈柱既指示。

鎌倉站東口有條小町街，勁多舖頭做遊客生意，都係我呢 d cheap 精試食既天堂，呵呵！自己慢慢行，影下相，幾舒暢，但見到爆笑野無人響隔離分享始終爭咁 d。



鶴岡八幡宮，勁出名，超多人，入場免費，200円睇文物國寶



鎌倉既人力車師傅好型好威武！



行到死先到既「錢洗弁財天」。鎌倉出名「洗」錢處 (唔係講笑，真係用水洗果隻洗)，傳說用呢度既水洗過既錢會愈來愈多，你話我係咪行到死都應該去洗一洗？ J





高德院大佛，細過天壇大佛好………多 (真係未見過大蛇屙尿！)，大佛仲畀人篤背脊篤到開左兩個窿。200円入場，20円入大佛身 (無咩特別，但20円，算啦！)





小小記事
不嬲都知日本旅遊區咩都興「限定」，鎌倉如是，「鎌倉限定」、「期間限定」叮噹扮佛頭電話繩、「鎌倉限定」Hello MiMi 手巾仔，如果你自制能力「有限」的話，好易畀佢地吸晒你 d 金，但當你知道咩都可以「限定」時，就知無可能買晒佢地返屋企，UM…是實上…我都忍得好辛苦呀。

呀 Wing 一句︰「江ノ島猫ばかり (江ノ島周度都係猫)。」我得登坐連接藤澤同鎌倉既江之電 (10 個得！) 去江ノ島，但其實你唔去江ノ島湘南海岸晒太陽既話，呢度都無咩睇，今日又落雨，猫猫唔多，即係話……去到江ノ島運吉！？都唔係既…





如果唔係屎忽痕既話，最好早少少出發，咁可以留鎌倉耐 d，穩陣起見 check 定「終電」(尾班車) 時間。

出發路線︰
飛田給 (京王線新宿行) > 調布 (京王相模原線急行) > 京王多摩 Center (行路) > 小田急多摩 Center (小田急多摩線) > 新百合ヶ丘 (小田急小田原線急行) > 藤澤 (JR 東海道本線．東京行) > 大船 (JR 湘南新宿．立子行) > 鎌倉 (江之電) > 江ノ島 >>> 1,170 円

回歸路線︰
江ノ島 (江之電) > 藤澤 (JR 東海道本線) > 武藏小杉 (南武線) > 分倍河原 (京王線) > 飛田給 >>> 1,160円 (YEAH，平過Yahoo條線 10円！！)

印鑑登錄

搞咩呀？又登錄？無錯，當張外國人登錄證到手後，就係時候做印鑑登錄 (參閱「一印在手．路路亨通」)。

去開到成行成市既 LAWSON 100 連鎖式 100 円店，好容易就買到「林」字既圓型印章，好興奮的在手上把玩了一下。中國文化、姓氏博大精深，100 円店唔一定有你個姓，唔駛 luet，可以搵間刻圖章既舖頭 tailor-make 一個，都係300-500円，好方便。

諗住外國人登錄證同印鑑登錄可以一齊做，點知拎住前者先可以辦理印鑑登錄，唉，煩到死。

外國人登錄證

想快快搞掂個外國人登錄證，我一早就去調布市市役所辦手續。

呢張證係暫住日本既外國人既身份證，必須響抵日後90天內辦理。市役所 d 人好helpful，你同佢講聲要申請「外國人登錄證」，佢就會畀張form 同 sample 畀你慢慢填，仲會響距離你兩個身位既地方靜靜咁望住你，你有少少好似有 d 唔識填，佢就會上前幫手。遞左 form 等 15 分鐘就可以攞到張行街紙，兩個禮拜左右card 就會到手喇，多謝 200 円，咁申請其他好多野都會方便好多…

手續其實好簡單，準備 Passport、2 張一模一樣既相，填張 form 就得，下面資料幫到你同我︰

http://www.moj.go.jp/ONLINE/ALIENREGISTRATION/17-1.html

「安」居．作狀

調布市飛田給既屋企距離車站 15 分鐘，如果響新宿返工，交通來回要成 1.5 鐘。好彩就話響新宿，如果響東京呀、神田呀，時間仲耐，車費仲好 come 計添︰230 円京王線 + 160 円山手線。

「首都圈租咁既價錢，仲想點？你想成年留響屋企呀？Kuo Loud Yeh！」

成功開門後，好作狀咁「よし(Yoshi)！」左一下，門口有個兩尺 x 尺半既位脫鞋，我一個唔為意，爭 d 仆左響度。Ok wor，斗室雖小，五臟尚且俱全，設備仲比想像中多，有 microwave 同飯煲！I LOVE THEM！我有信心同佢地可以好好相處半年。飛田給屬住宅區，亦夾雜了日漸被淘汰的工業株式會社，環境唔覆雜、入夜後好靜，好好住 (同我父母親大人傾開偈就幫手話佢地知啦！謝)。









Room-mate 6 月會去美國半年，即係話佢得2個禮拜 handover >> 垃圾分類、交租、家電操作等等 (至截稿當日仍未知仲有幾多未講 :p)，一個廣州人、一個香港人，偏偏要用日文溝通，我聽得辛苦、佢估到流晒汗，當有限公司既我頂唔順時就會用返偉大既母語問佢野。

落樓想熟習下四周環境，怎料短短半句鐘，我已經唔記得車站既方向 (失禮晒…)，隨便由屋企左右行20碼就返上屋整理整頓，開門時又再好作狀咁「ただいまTadaima…」係咪好日劇呢，唔好諗喇，快快成為 Working Holiday VISA holder 既其中一份子啦！！(申請詳情請見「瀛事精輯@申請」)

初黎報到 多多包涵

出發前一晚收到好多朋友既 sms，嘩，真係唔走唔知自己有咁多 friend，多謝晒！um…自己都有好痹咁 send msg 畀佢地，真係好唔捨得嫁。

畀個貼士大家，港鐡頭班車開 6am，但去到港鐡站仲要等 5-10 分鐘，往荃灣線更甚，要等成 20 分鐘，去到荔景又要再等，班機 8:05am，我諗大家估到我想講咩，無錯，係會趕唔切的…最後搞到要屈服於機場快線既淫威之下，受害人仲要有3位…爸爸媽媽同我… -_-"

一個大 gip、背囊、電腦、手袋同豹仔就咁陪我坐左 3.75 個鐘飛機，去到充滿蘿蔔頭既日本。可能知道自己會留一年，無好似方鍾 sir (sorly，倉頡無做到老學到老，真係打唔到個 sir 字 :p) 咁見到咩都 gogogo，倒覺得自己初黎報到，有好多時間去畀我慢慢explore 同撞板 (係呀，半日就瘀晒)。



同房要返工，畀左張無得再簡單既地圖畀我，叫我自己去到開信箱攞鎖匙。行過山、去過旅行、揸地圖多過揸兜既我，當然無問題 (自己覺得)，祈左禱，實去到啦，但望住個地址，…..3-44-20…..點睇呀？然而，唔好睇小26 歲的林詠詩，到左咁既年紀仲可以玩反叛︰「成年wor，唔通下下搵人幫？條條大路通羅馬，點都行到去既！」最後…因為個 gip 實在太重，問左個警察…結果，行左好多冤枉路，應該只係15分鐘既腳程，我行左成個鐘，對手更因為拖gip 搞到癱左。其實，叻既人應該係要一早開聲。

一印在手．路路亨通

IQ 題，抵達日本 Narita 機場後，第一時間要做咩？當然是先用力吸一啖日本新鮮空氣，再感謝神讓自己安全到步，然後滿有信心的辦理一大堆申請手續。

雖然手持為期一年既 Working Holiday VISA，看似風光，但唔好得戚得咁早，華麗背後，總藏暗湧~~

到步後最重要係申請外國人登錄，攞一張行街紙，亦即係你響果邊生活一年既身份證；下一步就係開個電話、搞上網、去銀行開戶口等等，嘩，緊要呀，出糧都係靠佢地，市役所仲有可能要求你買份保險。

日本人唔興簽名，你見日劇 d 男女主角離婚時都會用印章代替簽名。以上種種手續、申請，都要用個印章證明，所以唔理你有幾鍾意簽名都好，去到日本，都無得扮明星簽名，要去100Yen 店買返個圓形只刻姓氏既印章，然後到區/市役所做「印章登錄」，幫你個印做 record。聽朋友講個印唔一定刻有你既姓氏，求祈笑哈哈圖案都得，因為目的都係為個證明，但…好似好玩野咁…我諗…都係印個姓好 d。

日本の不動產

初到日本，去到仲介公司查詢及睇樓一定會聽到好多LDK、Room等terms，我在香港搵資料時都au晒頭。據了解，格局上日本屋係以房屋加廚房、客廳既數目黎定，大小會用帖/畳黎計，即榻榻米(TaTaMi)既單位，一片是3尺×6尺（910mm× 1820mm）=1.67㎡。

間取り(Floor plan) – 房間格局
D (Dining Room) – 飯廳
K (Kitchen) – 廚房
L (Living Room) – 客廳
R (Room Studio) –開放式房間
S (Storage) – 儲物室

如果間屋有1間房、廚房、飯廳及客廳既話，就會以1LDK表達。而1Room，即係我地所講既套房，唔好以為 “Room” 就係有門既房，其實係指成間屋就係一間房，入屋就會見到張床，會有簡單廚房，一般咁既格局既屋，只有16.5-23㎡。

咁即係點？嘗試畀以下例子作參考︰

1Room︰一般單人套房，有可作簡單煮食既廚房，約16.5-23㎡
1K︰瞓既位於同廚房分開，較 1Room大少少
1DK︰有獨立房間，唔駛一入屋就踩住張床過日子，租金就梗係貴 d 啦
1LDK︰租到就富貴了，夠一個家庭用，沖涼同廁所分開，約40-66㎡

另外，之前講既洋式、和式，究竟係咩呢？其實指屋既地板種類︰TaTaMi、木地板、膠地板同地毯。呢…記唔記得大雄瞓響間房偷懶時就係瞓住TaTaMi喇，即係和式，較傳統；至於花師奶，你會見到地板係木造的，容易清潔，但行起上黎可能會et et 聲，隔音做得唔好真係唔駛瞓。





有關其他terms 可瀏覽 All About (http://hk.uploader.blog.yahoo.com/post/All%20About%20不動産用語集)。

天有不測之「瘋牙」

過左25歲的我，成日都羨慕人 (包括我姐姐) 好型咁出智慧齒。當朋友同我講「四隻出晒喇」、「打麻醉針，Mork 晒喇」等等既時候，都會問「點解我咁遲都未出既？唔通唔出？」早幾年仲真係以為自己無智慧，所以無智慧齒，死唔死！？

當我慢慢脫離呢隻聰明牙既陰霾時，OMG~~好邪呀……早唔出遲唔出

右邊牙肉忽然劇痛左兩日，活左咁多年，最怕係瞓響張牙醫床度，望住 ''萬佳美'' (頭頂盞燈)，但無辦法，都要check check，結果係 …智慧齒降臨喇！！

不幸地，醫生話隻陰濕牙瞓低左，出唔到黎，為免去到日本先黎出事，長痛不如短痛，趁住感情唔係太深，好快就決定同佢做個了斷，但要 $2,000-3,000 掟煲費…呀！無錢呀！結果~~~我仍然同佢耦斷絲連…

香港一般醫療保險都唔包睇牙，有 d 仲會大大隻字標明一切與牙有關既檢查、手術一概不保，費用閣下自理，好肉痛嫁，唉…

隻陰濕牙就係瞓到好似咁︰

衣食住行仲要加個「做」

香港勞工處同日本領事館對Working Holiday參加者在日本打咩工有 d 規定，唔可以做與風月場所、賭博有關既工作，簡單黎講就唔好
啦！

講真…人在日本既我，為到當地兼顧「衣」、「食」、「住」、「行」各方面安排已非常懊惱，就黎無晒頭髮 (因為日日 au 爆頭…:p)，而家仲要諗埋個「做」，我暈喇。日本經濟唔好，失業率都幾高，唉…自己人都唔請，更何況係我地呢d 搞搞震既過客呢？

其實，在日本搵工做都應該唔難既，source多到爆，full-time、part-time網站多到一蘿蘿，點止jobs DB 咁簡單，問題係你夠唔夠好彩。同香港一樣，先要鎖定自己想做既工種，唔係就搵得好無目標。Frankly speaking，參加得Working Holiday就唔想做返寫字樓工，如果可以，我想做一 d 在香港一定唔會做既工作，咁先夠激 (唔好心邪，我梗係唔會做 AV) :p

想搵工搵得輕鬆又唔盲中中，事前準備功夫一定要做足，下面網站幫到我同你︰

Baotoru
Domo!Net
j.job – 標榜外國人材募集
Shigoto.in baito
楊旭中國語學院 – 可以應徵語言教師
仲有好多好多…
另外，在Google/Yahoo都可以アルバイト搜尋更多有用資料

交代清楚．走得輕鬆

之前有介紹過我買咩保險，若然覺得醫療保唔夠滿足你初到日本時既不安的話，不妨多買一分短期旅遊保，畢竟我地會帶一定物件過去，將唔見行履既風險轉嫁畀保險公司都幾好。

最緊要交代畀屋企人知你放左張保單響邊度，你知啦，辰時戊時出現既冬瓜豆腐…啋！！

1) 如果你有做野，出發前應該填好稅表，清晒有關手續，唔係會畀稅局追到瘦
2) 仲要 check 返所有自動轉賬、分期付款 item，例如，手機、上網費等等
3) 因為唔想 cut 香港既手機 plan，為左唔畀電訊公司cut我機，我一次過交晒一年電話費，尤佢慢慢扣，咁就唔駛煩啦
4) 最重要最重要係唔好掏空香港戶口，要預備 d 資金，若在日本發現銀根短缺，都可隨時請 parents 匯款畀你，
5) 交代你在日本風流快活既地址、同可信 & 醒目既朋友講多 d 在日本既情況，如果朋友唔介意，畀埋佢個電話屋企人，咁就「Working Holiday之嘛，駛乜驚呀！」

Working Holiday 都唔 Holiday 既…？

人地辭職我辭職，我辭到好似無辭咁，仲忙過返工，感覺參加 Working Holiday一 d 都唔 Holiday…

打從辭職果日開始就忙到甩肺，搵屋、搵工唔駛講，定出發日子、book 平機票，下下都要諗過度過，最緊要係通知好朋友你既離開 (多謝香港傳媒幫手報道，讓我省卻不少電話費，哈哈)、同佢地食飯。

雖然日日無時停，夾食飯時間夾到癲 (個個friend都是大忙人 ^_^)，但我好proud of自己有咁多珍惜自己既朋友 (哎呀，搞到好似就死咁，啋！都係一年姐 -__-'')，日日忙都抵啦！當然，出去食飯唔會 expect 朋友請客，但如果朋友願意既話就唔好婉拒，表示佢地賺到錢，尤佢地請啦！至多去到日本，響100Yen 店買 d 睇上去值成1,000Yen 既手信畀佢地 lor，哈哈哈！(「駛唔駛cheap成咁呀…heehee」)
Working Holiday 前唔 ''Holiday'' 絕對唔係問題，做人要睇遠 d，應做足準備，同真正既 365日Working Holiday 鴛鴦戲水，呵呵呵呵…！